- आशिया चषकमध्ये टीम इंडियाकडून चमकदार कामगिरी करणारा युवा फलंदाज अभिषेक शर्मा सध्या चर्चेत आहे. त्याने प्रत्येक सामन्यात आपली छाप पाडलेली दिसते. खास करून पाकिस्तानविरुद्ध त्याची बॅट चांगलीच तळपली होती. 25 वर्षांच्या अभिषेकने पाकिस्तान आणि त्यानंतर बांगलादेशविरुद्धच्या सुपर 4 सामन्यांमध्ये अर्धशतके झळकावून आपली फलंदाजीतील क्षमता सिद्ध केली आहे. त्याच्या या कामगिरीमुळेच तो 907 रेटिंग गुणांसह ICC T-20 रँकिंगमध्ये अव्वलस्थानी आहे. जगातला तो अव्वल क्रमांकाचा फलंदाज ठरला आहे. कमी वेळात त्याने हे यश मिळवले आहे. अशावेळी त्याची एकूण संपत्ती किती याची ही चर्चा सुरू झाली आहे. अभिषेकने 2024 मध्ये आंतरराष्ट्रीय क्रिकेटमध्ये पदार्पण केले होते. त्याच्या सातत्यपूर्ण खेळाचा परिणाम म्हणून 2025 पर्यंत त्याला बीसीसीआयने ग्रेड C चे कॉन्ट्रॅक्ट दिले आहे. या करारानुसार, त्याला वार्षिक एक कोटी रुपये मिळतात. सेंट्रल कॉन्ट्रॅक्टव्यतिरिक्त, त्याला प्रत्येक आंतरराष्ट्रीय सामना खेळण्यासाठी बोर्डाकडून प्रति सामना तीन लाख रुपये मिळतात. पाकिस्तानविरुद्ध 74 धावांची खेळी केल्यानंतर त्याला ‘मॅन ऑफ द मॅच’ पुरस्काराने सन्मानित करण्यात आले होते. त्यासाठी त्याला वेगळे बक्षिसही मिळाले होते.
- अभिषेकच्या कमाईचा मोठा स्रोत म्हणजे इंडियन प्रीमियर लीग (आयपीएल) आहे. आयपीएल 2025 साठी सनरायझर्स हैदराबादने त्याला 14 कोटी रुपयांना रिटेन केले आहे. मीडिया रिपोर्ट्सनुसार, अमृतसरचा रहिवासी असलेल्या या युवा खेळाडूची एकूण संपत्ती 25 ते 30 कोटी रुपयांच्या दरम्यान आहे. त्याच्याकडे अलिशान अशी BMW 320d आणि BMW 3 सीरिज सारखी आलिशान वाहने आहेत. अमृतसरमध्ये त्याचा आलिशान बंगला आहे. तो रिअल इस्टेटमध्येही गुंतवणूक करत आहे.
25 वर्षांच्या अभिषेक शर्माची संपत्ती किती?
