- सोलापूर शहर व जिल्ह्यात वाढत असलेले गुन्हेगारीचे प्रमाण चिंताजनकच म्हणावे लागेल. विशेषत: पती-पत्नी यांच्यातील संघर्ष टोकला जाऊन विपरित घटना घडल्या आहेत. अशीच एक चक्रावणारी घटना करमाळा शहरात घडली आहे. पतीने पत्नीचा खून करून आत्महत्येचा बनाव रचला. मात्र, पोलिसांच्या सतर्कतेने हा डाव त्याच्याच अंगलट आला.
पोलिसांनी दिलेल्या माहितीनुसार करमाळ शहरातील फंड गल्लीत उमा प्रफुल्ल पवार (वय 32) व तिचा पती प्रफुल्ल विठ्ठल पवार (वय 41) हे राहात असत. प्रफुल्ल याला दारूचे व्यसन होते. परिणामी तो आपल्या कुटुंबाची जबाबदारी योग्यरित्या सांभाळत नव्हता. परिणामी मुलांचे पालन-पोषण होणे अतिशय कठीण बनले होते. परिणामी उमा हिने गेल्या तीन वर्षांपूर्वी तिचा थोरला मुलगा महेश याला शिक्षणासाठी मोहोळ येथे स्वत:च्या भावाकडे अर्थात महेशच्या मामाकडे पाठवले होते. मात्र हीच बाब प्रफुल्ल याला खटकली होती. याचा राग त्याच्या मनात खदखदत होता. याच गोष्टीवरून उमा आणि प्रफुल्ल यांच्या सतत भांडणे व्हायची. इतकेच नव्हे तर प्रफुल्लने उमाला दारूच्या नशेत मारहाण करायला सुरुवात केली. दरम्यान, गेल्या आठवड्यात नागपंचमीच्या सणानिमित्त महेश करमाळ्यात आला होता. याचवेळी प्रफुल्लने दारूच्या नशेत उमा आणि महेशला जीवे मारण्याची धमकी दिली.
घटनेच्या दिवशी प्रफुल्लने पुन्हा दारूच्या नशेत भांडण काढून उमाच्या डोक्यात धारदार हत्याराने प्रहार केला. प्रचंड रक्तस्राव होऊन उमा निपचित पडली. या घटनेची माहिती घराबाहेर खेळणार्‍या मुलांना समजली. मात्र उमाने गळफास घेण्याचा प्रयत्न केला आणि खाली पडल्याने ती मरण पावल्याची खोटी माहिती प्रफुल्लने पोलिसांना मात्र वैद्यकीय तपासणी अहवालानुसार हा आत्महत्येचा नव्हे तर खूनाचा प्रयत्न असल्याने स्पष्ट झाले. हा खून प्रफुल्लनेच केल्याचे पोलीस तपासात सिध्द झाले. प्रफुल्ल आता जेलची हवा खात आहे.
