पुण्यात राष्ट्रवादीच्या नेत्याने एका व्यक्तीला उचलून आपटले, व्हिडिओ व्हायरल झाला
उपमुख्यमंत्री अजितदादा पवार यांचे निकटवर्तीय, पुणे महापालिकेचे माजी स्थायी समिती अध्यक्ष बाबुराव चांदेरे यांनी काल एका व्यक्तीला मारहाण केल्याचे समोर आले होते. याप्रकरणी आता सदरील व्यक्तीच्या तक्रारीनंतर चांदोरे यांच्यावर गुन्हा दाखल झाला आहे. त्यासह अजितदादांनी देखील चांदेरे यांच्याबद्दल नाराजी व्यक्त करत सुनावले आहे.
चांदोरे हे अजितदादांचे निकटवर्तीय आणि महापालिकेच माजी स्थायी समिती अध्यक्ष होते. मात्र, काल चांदेरे यांनी विजय रौंदळ या व्यक्तीला मारहाण केली होती.
याचा व्हिडिओ व्हायरल झाला होता. आता रौंदळ यांनी चांदेरे यांच्याविरोधात बावधन पोलीस ठाण्यात तक्रार दाखल केली होती. त्यानुसार चांदेरे यांच्यावर गुन्हा दाखल झाला आहे.
पुण्यातील सूसगाव येथे बाबुराव चांदेरे यांनी जमिनीच्या वादातून रौदळ यांना मारहाण केली. रौदळ व्हिडिओ काढत असताना चांदेरे अचानक तिथे आले, त्यांनी रौदळ यांना गाडीत बस, असे सांगितले.
मारहाणीबद्दल विचारल्यावर अजितदादांनी, पक्षात असा प्रकार खपवून घेणार नाही, असे ठणकावून सांगितले आहे. मी तो व्हिडिओ पाहिला. हे अतिशय चुकीचे आहे. कोणालाही कायदा हातात घेता येत नाही. तो अधिकार आपण कोणालाही दिला नाही. त्यामुळे मी चांदेरेला फोन केला होता. मात्र, त्याने फोन डायव्हर्ट केला होता. त्याच्या मुलाशी मी बोललो. मुलगा म्हणाला, की ते घरी नाहीत. मी मुलाला म्हटलं की, जे काही क्लीपमध्ये बघितलं, ते मला अजिबात आवडले नाही. अशा पद्धतीने राष्ट्रवादी काँग्रेसच्या कुठल्याही कार्यकर्त्यांनी केलेले मी खपवून घेणार नाही. मला त्याला ( बाबुराव चांदेरे ) बोलवून जाब विचारायचा आहे की, याच्या पाठीमागचे कारण काय? असे अजितदादांनी म्हटले.
