- भाजपचे माजी खासदार सुजय विखे पाटील यांच्या युवा संकल्प मेळाव्यात काँग्रेस नेते बाळासाहेब थोरात यांच्या कन्या जयश्री थोरात यांच्याबद्दल आक्षेपार्ह विधान करण्यात आल्याने संगमनेरमध्ये राजकीय वातावरण तापले आहे. कॉँग्रेसकडून येथे आक्रमक भूमिका घेण्यात आली आहे. काल रात्री अज्ञातांकडून वाहनांची तोडफोड आणि जाळपोळ करण्यात आली. कॉँग्रेसकडून येथे रात्रभर ठिय्या आंदोलन देखील करण्यात आले.
- संगमनेर तालुक्यातील धांदरफळ गावात काल सुजय विखे यांची सभा झाली. या सभेत बाळासाहेब थोरात यांच्या मुलीबद्दल आक्षेपार्ह वक्तव्य करण्यात आले. तुमच्या कन्येला समजवा, नाहीतर आम्ही निवडणुकीच्या काळात मैदानात उतरलो, तर तुमची मुलगी घराबाहेर पडणार नाही. सुजय विखे पाटील, त्यांना ताई म्हणातात. पण सुजयदादा या ताईचे पराक्रम सगळ्या तालुक्याला माहिती आहे, असे वक्तव्य भाजप नेते वसंतराव देशमुख यांनी केले. देशमुख यांच्या विरोधात काँग्रेस कार्यकर्ते आक्रमक झाले.
