ब्रेकिंग! संजय दत्तच्या एका चुकीमुळेच मुंबईत बॉम्बस्फोटाचे धमाके

१९९३ च्या मुंबई बॉम्बस्फोटांना थांबवता आले असते जर अभिनेता संजय दत्त याने ज्या कारमधून एके-४७ बंदूक उचलली होती, त्या कारबद्दल पोलिसांना सांगितले असते तर हे स्फोट कधीच झाले नसते, असे विधान ज्येष्ठ वकील उज्ज्वल निकम यांनी केले आहे. संजय दत्तकडे एके-४७ होती, मात्र त्याने कधीही ती बंदूक चालवली नाही, असेही निकम यांनी म्हटले आहे. एका वृत्तवाहिनीला दिलेल्या मुलाखतीत निकम बोलत होते.
उज्ज्वल निकम म्हणाले, बॉम्बस्फोटांच्या काही दिवस आधी दाऊद इब्राहिमसाठी काम करणारा अबू सालेम हा शस्त्रांनी भरलेली व्हॅन घेऊन संजय दत्तच्या घरी आला होता. त्यात हँडग्रेनेड आणि एके-४७ होती. संजय दत्तने त्यातून काही वस्तू घेतल्या आणि नंतर त्या परत केल्या. पण, एके-४७ स्वत:कडे ठेवून घेतली. याबद्दल पोलिसांनी माहिती न देणे हे स्फोटांचे कारण बनले. ज्यात लोक मृत्यूमुखी पडले.
संजय दत्त निर्दोष होता, त्याला शस्त्रांची आवड असल्यानेच बंदूक ठेवली होती. कायद्याच्या दृष्टीने त्याने गुन्हा केला, पण तो एक साधा माणूस आहे. संजय दत्तकडे एके-४७ होती मात्र त्याने कधीही बंदूक चालवली नाही. परंतु, पोलिसांना त्याबद्दल माहिती न देणे हेच इतक्या लोकांच्या मृत्यूचे कारण होते, असे निकम यांनी सांगितले.