ब्रेकिंग! भारत-पाकिस्तान मॅचपूर्वी मोठा निर्णय

भारत आणि पाकिस्तानमधील प्रत्येक क्रिकेट सामना लाखो चाहत्यांच्या हृदयाचे ठोके वाढवतो. आता, जेव्हा दोन्ही संघ आशिया कप 2025 च्या अंतिम फेरीत आमनेसामने येतील, तेव्हा उत्साह आणखी वाढेल. 41 वर्षे आणि 16 आवृत्त्यांमध्ये प्रथमच भारत आणि पाकिस्तान आशिया कपच्या अंतिम फेरीत खेळतील.
या महत्त्वाच्या लढाईपूर्वी बीसीसीआयने आता एक निर्णय घेतला आहे. दिल्लीचे माजी कर्णधार मिथुन मन्हास हे बीसीसीआयचे नवे अध्यक्ष बनले आहेत. मुंबईतील वानखेडे स्टेडियममधील बीसीसीआय मुख्यालयात वार्षिक सर्वसाधारण सभेचे आयोजन करण्यात आले होते. त्यामध्ये हा निर्णय घेण्यात आला आहे. भारतीय क्रिकेट व्यवस्थापनाची जबाबदारी आता मिथुन यांच्याकडे असणार आहे.
मन्हास यांच्या नियुक्तीमुळे बीसीसीआयच्या खेळाडू केंद्रित धोरणांना आणखी बळकटी मिळेल. तसेच तरुण क्रिकेटपटूंच्या विकासावर विशेष भर दिला जाईल, अशी अपेक्षा आहे. दुसरीकडे, राजीव शुक्ला उपाध्यक्षपदी कायम असणार आहेत. देवजीत सैकिया सचिव, प्रभतेज सिंग भाटिया संयुक्त सचिव आणि रघुराम भट्ट खजिनदार असतील.
मन्हास हे बीसीसीआयचे अध्यक्ष होणारे तिसरे क्रिकेटपटू आहेत. यापूर्वी सौरव गांगुली आणि रॉजर बिन्नी यांनी ही भूमिका बजावली आहे. बिन्नी यांच्या जागी आता ते अध्यक्षपद भूषविणार आहेत. बिन्नी यांना वयोमर्यादेमुळे राजीनामा द्यावा लागला होता. मन्हास यांची नियुक्ती झाल्यानंतर पहिल्यांदाच एका अनकॅप्ड खेळाडू बीसीसीआयचे अध्यक्षपद भूषवणार आहे.
मन्हास उजव्या हाताचे फलंदाज होते आणि आवश्यकतेनुसार ऑफ-स्पिन गोलंदाजीही करत. त्यांची प्रतिभा यावरच संपत नाही, ते विकेटकीपिंगही करू शकत होते. त्यांच्या 18 वर्षांहून अधिक काळ चाललेल्या फर्स्ट-क्लास करिअरमध्ये मिथुन यांनी 157 सामने खेळले आणि सुमारे 9,714 धावा केल्या. या दरम्यान त्यांची सरासरी 46. होती. तसेच त्यांनी 27 शतके आणि 49 अर्धशतके ही झळकावली आहेत.